བོད་ལྗོངས།
དཀའ་སྤྱད་ལས་ལ་བརྩོན། ཕྱུག་འགྱུར་ལམ་བུ་ཡངས།

    —— སྟོད་ལུང་བདེ་ཆེན་ཆུས་བདེ་ཆེན་གྲོང་རྡལ་སྡིངས་ཁ་གྲོང་ཚོའི་ངག་དབང་གི་དབུལ་སྒྲོལ་ལམ་བུ།

    ལྷ་ས་དང་བར་ཐག་སྤྱི་ལེ་70ལྷག་ཙམ་ཆོད་པའི་སྟོད་ལུང་བདེ་ཆེན་ཆུས་བདེ་ཆེན་གྲོང་རྡལ་སྡིངས་ཁ་གྲོང་ཚོའི་ངག་དབང་གི་ཁྱིམ་ཚང་གྲོང་ཚོའི་རི་རྐེད་དུ་ཆགས་ཡོད། བདེ་སྡོད་ལས་གྲྭའི་དྲིན་གྱིས་སྨི་ངོས་གྲུ་400ལྷག་གི་བོད་བཟོའི་ཐོག་ཁང་ཆུང་ངུ་དེ་དཀར་ཆ་དོད་པ་མ་ཟད། འཁྱག་སྒམ་དང་ཚོན་ཁྲ་ཅན་གྱི་བརྙན་འཕྲིན་སོགས་གློག་ཆས་མི་འཛོམ་པ་གཅིག་ཀྱང་མེད། ངག་དབང་གི་ཁྱིམ་ནས་སྡིངས་ཁ་གྲོང་ཚོར་བལྟས་ཚེ། ཡུལ་མིའི་སྡོད་ཁང་གྲལ་སྒྲིག་ཅིང་གཙང་སྦྲ་དོད་པ་ཞིག་ཡོད།

    སྡིངས་ཁ་གྲོང་ཚོའི་ངག་དབང་གི་ནང་མིའི་འདྲ་པར།

    ངག་དབང་ཕྱིར་ལས་ཀ་བྱེད་པར་འགྲོ་བ་དང་། བཟའ་ཟླ་རྡོ་རྗེ་སྒྲོལ་དཀར་གྱིས་ཕྲུ་གུ་གཉིས་ལྟ་ཞོར་ཁྱིམ་ལས་ཙག་ཙིག་བྱེད་ཀྱི་ཡོད།

    2013ལོར། རྡོ་རྗེ་སྒྲོལ་དཀར་དང་ངག་དབང་གཉེན་སྒྲིག་བྱས་མ་ཐག་པའི་སྐབས་འཚོ་བའི་ཐད་དཀའ་ངལ་མང་པོ་འཕྲད།

    ངག་དབང་ཁྱིམ་གྱི་དཀར་ཆ་དོད་པའི་ཚོམས་ཁང་།

    གྲོས་བསྡུར་བྱས་པ་བརྒྱུད། རྡོ་རྗེ་སྒྲོལ་དཀར་གྱིས་ཞོར་ཟས་ཁང་ཞིག་གཉེར། ཞོར་ཟས་ཚོང་ཞོར་ད་དུང་ཚལ་བཙོངས་ནས་ལོ་གཉིས་འབད་འབུངས་ཧུར་ཐག་བྱས་ཀྱང་། ཁང་གླ་དང་ཆུ་རིན། གློག་རིན་ཙམ་ལས་ཡོང་འབབ་གསོག་ཐུབ་མེད།

    “ངག་དབང་། བདེ་སྡོད་ལས་གྲྭ་སྤེལ་གྲབས་འདུག རྒྱལ་ཁབ་ཀྱིས་ཁ་གསབ་ཁག་གཅིག་སྤྲོད་པའི་ཁར་རང་ཉིད་ཀྱིས་མ་དངུལ་ཁག་གཅིག་བཏོན་ན་སྡོད་ཁང་གསར་པ་རྒྱག་ཐུབ་ཀྱི་འདུག” 2015ལོར། སྡིངས་ཁ་གྲོང་ཚོའི་ཀྲི་པུའི་ཧྲུའུ་ཅི་ཨོ་རྒྱན་གྱིས་གཏམ་བཟང་དེ་བཤད།

    སྡིངས་ཁ་གྲོང་ཚོའི་གྲོང་མིས་དགའ་སྤྲོའི་སྒོར་གཞས་འཁྲབ་ནས་བདེ་སྐྱིད་ལྡན་པའི་འཚོ་བར་བསྟོད་པ།

    “རྒྱག་གི་ཡིན”ཞེས་ཁྱོ་ཤུག་གཉིས་ཀས་མགྲིན་གཅིག་ཏུ་བཤད། དེ་ལྟར་རང་གིས་བསགས་པའི་སྒོར་ཁྲི་5ཡི་ཁར་སྒོར་ཁྲི་5གཡར་ནས་ངག་དབང་བཟའ་ཚོས་རང་གཉིས་ལ་དབང་བའི་སྡོད་ཁང་བརྒྱབ། སྡོད་ཁང་ཡོད་ཀྱང་བུ་ལོན་དུས་ཐོག་ཏུ་སྤྲོད་དགོས་པས་འབབ་འཕར་གྱི་ལམ་བུ་གཞན་ཞིག་མི་འཚོལ་ཐབས་མེད་བྱུང་།

    “ངས་ཐབས་ཤེས་ཤིག་བསླབ་ཆོག ངག་དབང་ལ་ཚལ་སྐྱེལ་བའི་ཉམས་མྱོང་ཡོད་པས། ཁ་ལོ་བའི་ལག་ཁྱེར་བླངས་ནས་སྐྱེལ་འདྲེན་གྱི་ལས་ལ་གཞོལ་ན། ད་ཆ་ལྷ་སའི་མཐའ་འཁོར་དུ་སྐྱེལ་འདྲེན་ཁ་ལོ་བ་ཅུང་དཀོན་པོ་འདུག”ཅེས་ཧྲུའུ་ཅི་ཨོ་རྒྱན་གྱི་སྐད་ཆས་ཁ་ལོ་བའི་ལག་ཁྱེར་ལེན་རྒྱུའི་ཐག་བཅད།

    ངག་དབང་གི་བུ་གཉིས་པོ་སློབ་གྲྭ་གྲོལ་རྗེས་ནང་དུ་ལོག་ནས་རྩེད་འཇོར་རོལ་བ།

    ཁ་ལོ་བའི་ལག་ཁྱེར་རག་རྗེས། ངག་དབང་གིས་ཧྲུའུ་ཅི་ཨོ་རྒྱན་གྱིས་བཏོན་པའི་གྲོས་འགོ་བཞིན། ལྷ་སའི་ཨར་པོ་རྒྱག་ཡུལ་ཁག་ཏུ་རྒྱུ་ཆ་དབོར་བ་དང་། ཞིང་དལ་སྐབས་ཁྱིམ་དུ་ལོག་ནས་བཟའ་ཟླར་རོགས་པ་བྱས། 2016ལོར། ངག་དབང་གི་ཁྱིམ་ཡང་གྲོང་མི་གཞན་དང་འདྲ་བར་དབུལ་སྒྲོལ་ཐུབ།

    གསར་པ་བསྐྲུན་པའི་སྡིངས་ཁ་གྲོང་ཚོའི་སྐད་གཉིས་བུ་བཅོལ་ཁང་།

    གྲོང་མིའི་འཚོ་བ་ཇེ་ལེགས་ནས་ཇེ་ལེགས་རེད། སྡིངས་ཁ་གྲོང་ཚོའི་མི་སྡོད་ཁོར་ཡུག་ཀྱང་རིམ་བཞིན་ལེགས་སུ་འགྲོ་བཞིན་ཡོད། ཉེ་བའི་ལོ་ཤས་རིང་། གྲོང་ཚོའི་རྨང་གཞིའི་སྒྲིག་བཀོད་འཛུགས་སྐྲུན་འཐུས་སྒོ་ཚང་དུ་ཤུགས་ཆེན་བཏང་ནས་གྲོང་ཚོ་རིམ་པའི་བགྲོད་ལམ་ཤར་གཏོང་བྱས་པ་དང་སྦྲགས། གྲོང་ཚོའི་རྙིང་ཞན་དུ་གྱུར་པའི་མདོང་ལམ་གཙོ་བོ་དང་ཡན་ལག་མདོང་ལམ་ཚང་མ་གསར་པ་བརྗེས་པ་དང་མ་ཟད་ཆུ་ཡུར་བཟོས་ནས་རྒྱུན་གཏན་གྱི་རྨོ་འདེབས་སྤྱོད་ཆུ་དང་མི་ཕྱུགས་ཀྱི་འཐུང་ཆུ་འགན་ལེན་བྱས། དེ་དང་ཆབས་ཅིག རེས་སྐོར་གསར་པའི་གྲོང་གསེབ་གློག་དྲ་རིམ་སྤོར་སྒྱུར་བཀོད་ལས་གྲྭ་སྤེལ་ནས། གྲོང་ཚོའི་ལམ་རྒྱུད་ཚང་མར་རླུང་ནུས་དང་ཉི་ནུས་ཀྱི་ལམ་སྒྲོན་བསྒར་ཡོད་ཅེས་ཨོ་རྒྱན་གྱིས་གསར་འགོད་པར་བཤད།

    རྡོ་རྗེ་སྒྲོལ་དཀར་གྱིས་ལས་ལ་བརྩོན་པའི་ལག་ཟུང་ལ་བརྟེན་ནས་བདེ་སྐྱིད་ལྡན་པའི་འཚོ་བ་གཏོད་པ།

    རྡོ་རྗེ་སྒྲོལ་དཀར་ཡང་གྲོང་ཚོའི་བུད་མེད་གཞན་དང་འདྲ་བར་མ་བྱན་གསོ་སྦྱོང་འཛིན་གྲྭར་ཞུགས་ནས། འབྲིང་རིམ་མ་བྱན་གྱི་ཐོབ་ཐང་ལག་ཁྱེར་བླངས་ཏེ། གཞན་དང་མཉམ་དུ་ཇ་ཁང་ཞིག་གཉེར་རྩིས་ཡོད་པ་རེད།

    སྡིངས་ཁ་གྲོང་ཚོའི་རྨོ་ཞིང་།

འགན་འཁུར་རྩོམ་སྒྲིག་པ། བསྟན་ནོར།

ཤིན་ཧྭ་དྲ་བ་མ་རྐང་ཚད་ཡོད་ཀུང་སིའི་བོད་ལྗོངས་ཡན་ལག་ཀུང་སི། ཤིན་ཧྭ་དྲ་བའི་བོད་ལྗོངས་འཕྲིན་ལམ། ཞལ་པར་ཨང་གྲངས། ༠༨༩༡--༦༢༨༢༥༢༡

Copyright @ 2000-2020 XINHUANET.com All Rights Reserved.

འདི་ག་དྲ་ཚུགས་ཐོག་བཀོད་པའི་ཤིན་ཧྭ་གསར་འགྱུར་ཁང་དང་ཤིན་ཧྭ་དྲ་བའི་གསར་འགྱུར། ཆ་འཕྲིན། དེ་བཞིན་ཆེད་སྒྲིག་སོགས་ཀྱི་ཡིག་ཆ་ཚང་མའི་བདག་དབང་ཤིན་ཧྭ་གསར་འགྱུར་ཁང་ལ་བདག་པས་གན་རྒྱ་དང་དབང་ཆ་སྤྲད་མེད་ཚེ་རང་དགར་ཕབ་སྤྱོད་བྱེད་མི་ཆོག

010020070840000000000000011100001392898831