བོད་ལྗོངས།
ལྷ་སས་ཐང་གའི་ཐོན་ལས་གླིང་བཙུགས་ཏེ་བོད་ཀྱི་རིག་གནས་དང་ཡུལ་སྐོར་གྱི་ཁྱད་ལྡན་མཚོན་རྟགས་བཏོད་པ།

    ཟླ་བཞི་པའི་ཟླ་སྨད་བར། བོད་ལྗོངས་ལྷ་སས་རྒྱལ་ཡོངས་སུ་གཞི་ཁྱོན་ཆེ་ཤོས་དང་ཐོན་ལས་འཁོར་སྦྲེལ་ཆ་ཚང་ཤོས་ཀྱི་ཐང་གའི་རིག་གནས་སྒྱུ་རྩལ་ཐོན་ལས་གླིང་65%བསྐྲུན་པ་མ་ཟད། འདི་ལོའི་ལྷ་སའི་ཞོ་སྟོན་སྐབས་དངོས་སུ་གཉེར་སྐྱོང་ཚོད་ལྟ་བྱེད་རྒྱུ་ཡིན་པ་རེད། རྣམ་གྲངས་དེས་ཐང་གའི་ཐོན་ལས་དང་སྤྲོ་གསེང་རིག་གནས་ཡུལ་སྐོར་གཙོ་བོར་བྱས་ཏེ་བོད་ཀྱི་ཐང་གའི་རིག་གནས་ཐོན་ལས་ཀྱི་སྤུས་རྟགས་ནུས་ཤུགས་ཡོད་རྒུས་བཏོད་ནས། ཀྲུང་གོའི་ཐང་གའི་རིག་གནས་རྩེ་གྲ་དང་། ཐང་གའི་རིག་གནས་གསར་གཏོད་ཐོན་ལས་རྩེ་གྲ དེ་བཞིན་བོད་ཀྱི་རིག་གནས་དང་ཡུལ་སྐོར་གྱི་ཁྱད་ལྡན་མཚོན་རྟགས་གསར་པ་བཅས་སུ་ཧུར་ཐག་འགྱུར་བར་བྱེད་པ་དང་ཆབས་ཅིག བོད་ཀྱི་ཐང་གའི་ཤེས་ལྡན་པ་གསོ་སྐྱོང་བྱེད་ཐབས་འཚོལ་ཞིབ་ཧུར་ཐག་བྱས་ཏེ། ཐང་ག་གསར་བཞེངས་ལས་རིགས་སློབ་གསོ་ལྟེ་གནས་དང་། ཐང་གའི་སྒྱུ་རྩལ་གསོ་སྦྱོང་གི་སྒྲིག་གཞི། ས་ཁུལ་དབུལ་པོར་ཐང་གའི་གསོ་སྦྱོང་སློབ་གྲྭ་བཅས་བཙུགས་ནས་དབུལ་སྒྲོལ་འགག་སྒྲོལ་ལ་རམ་འདེགས་ཀྱང་བྱ་རྒྱུ་རེད།

    ཤེས་རྟོགས་བྱུང་བར་གཞིགས་ན། ཐང་གའི་རིག་གནས་སྒྱུ་རྩལ་ཐོན་ལས་གླིང་རྣམ་གྲངས་ཀྱིས་བོད་ཀྱི་སྲོལ་རྒྱུན་རིག་གནས་སྲུང་སྐྱོང་དང་། རྒྱུན་འཛིན། འཕེལ་རྒྱས་བཅས་བྱེད་པའི་རྨང་གཞིའི་ཐོག ཐང་གའི་སྒྱུ་རྩལ་བརྩམས་ཆོས་དང་། ལས་སྣོན། འགྲེམས་སྟོན། ཕྱིར་ཚོང་། ཟབ་སྦྱོང་། ཉམས་ལེན་བཅས་གཞི་གཅིག་ཏུ་འདུས་ཏེ། སྤྲོ་གསེང་ཡུལ་སྐོར་དང་། སློབ་གསོ་གསོ་སྦྱོང་། ཐང་གའི་སྒྱུ་རྩལ་བཅས་བརྗོད་དོན་གཙོ་བོར་བྱས་པའི་རིག་གནས་དང་ཡུལ་སྐོར་ཐོན་ལས་གླིང་གི་རྣམ་གྲངས་ཆེ་གྲས་གཉེར་ཡོད་པ་རེད། གླིང་དེས་བོད་ཀྱི་ཐང་གའི་རིག་གནས་ཐོན་ལས་གླིང་དང་ཐང་གའི་རྟེན་རྫས་བཤམས་མཛོད་ཁང་ལྟེ་བར་བྱས་ཏེ། ལྷ་འབྲི་བའི་ལས་དོན་ཁང་དང་། ཐང་ག་འགྲེམས་སྟོན་དང་བྲིན་ཚོང་ལྟེ་གནས། གསར་གཏོད་ལས་རིགས་སློབ་གསོ་ལྟེ་གནས། ཐང་གའི་ཐོན་རྫས་ཀྱི་དྲ་སྦྲེལ་ཉོ་ཚོང་ལས་སྟེགས། ས་ཁུལ་དབུལ་པོའི་ཐང་གའི་གསོ་སྦྱོང་སློབ་གྲྭ ལུགས་མི་འདྲ་བའི་ཐང་གའི་རིག་གནས་འགྲེམས་ཁུལ་དང་ཚོང་ལས་ཁུལ། དེ་བཞིན་ལེ་ལག་ཚང་བའི་ཟོག་འགྲེམས་ལྟེ་གནས་དང་གཉེར་སྐྱོང་དོ་དམ་སོགས་བྱེད་ནུས་ཁུལ་མང་པོ་བཙུགས་ཡོད་པ་རེད།

འགན་འཁུར་རྩོམ་སྒྲིག་པ། ཟླ་བ་ཚེ་རིང་།
010020070840000000000000011100001390785741