བོད་ལྗོངས།
ཨ་ཕའི་སེམས་ཀྱི་འཁེན་ས། ཨ་མའི་སྙིང་གི་ནོར་བུ།

    སྤེན་ཚེ་གཞོན་པ།    

    ཨ་མའི་སྙིང་གི་ནོར་བུ། །

    ཨ་ཕའི་སེམས་ཀྱི་རྟེན་ས། །

    དྲོ་སྐྱིད་ལྡན་པའི་རུམ་ཁར། །

    ཞིམ་མངར་ནུ་ཞོ་བླུད་ཡོད། །

    བྱམས་དང་བརྩེ་བའི་མིག་གིས། །

    ཆུང་ནས་ཆེ་རུ་གསོས་ཡོད། །

    ཨ་མའི་སྙིང་གི་ནོར་བུ། །

    ཨ་ཕའི་སེམས་ཀྱི་རྟེན་ས། །

    བཟང་དྲུག་བསླབ་བྱའི་སྨན་གྱིས། །

    ཡིད་ཀྱི་གཅོང་ནད་སེལ་ཡོད། །

    དྭངས་གཙང་སེམས་ཀྱི་ནམ་མཁར། །

    ནག་ནོག་དྲི་མ་མེད་ཤོག །

    ཨ་མའི་སྙིང་གི་ནོར་བུ། །

    ཨ་ཕའི་སེམས་ཀྱི་རྟེན་ས། །

    ལྔ་རིག་དགའ་ཚལ་གླིང་དུ། །

    ཤེས་རིག་སློབ་པར་བཏང་བས། །

    བརྩོན་འགྲུས་གཤོག་ཟུང་རྡེབ་བཞིན། །

    བཅུད་ལྡན་སྦྲང་རྩི་ལེན་ཤོག །

    ཨ་མའི་སྙིང་གི་ནོར་བུ། །

    ཨ་ཕའི་སེམས་ཀྱི་རྟེན་ས། །

    གཞོན་ལ་བརྩེ་བས་སྐྱོང་བཞིན། །

    རྒན་ལ་བཀུར་བསྟི་མ་ཆུང་། །

    མཉམ་དང་མཐུན་པར་འགྲོགས་པའི། །

    སྤུན་བཞིའི་རྣམ་ཐར་སྐྱོངས་ཤོག །

    ཨ་མའི་སྙིང་གི་ནོར་བུ། །

    ཨ་ཕའི་སེམས་ཀྱི་རྟེན་ས། །

    དལ་འབྱོར་མི་ལུས་རིན་ཆེན། །

    རྙེད་པར་ཤིན་ཏུ་དཀའ་བས། །

    གཞན་ཕན་ལྷག་བསམ་བཟང་པོས། །

    གཞན་ལ་བདེ་བ་སྐྲུན་ཤོག །

    ཨ་མའི་སྙིང་གི་ནོར་བུ། །

    ཨ་ཕའི་སེམས་ཀྱི་རྟེན་ས། །

    ཕ་སྐད་ཆུ་རྒྱུན་མ་ཆད། །

    མ་ཡིག་རྫིང་བུ་མ་བསྐམས། །

    གཅེས་པའི་རིན་ཆེན་སྲོག་ལྟར། །

    སྙིང་གི་བུ་གར་འཛིན་ཤོག །

འགན་འཁུར་རྩོམ་སྒྲིག་པ། ཟླ་བ་ཚེ་རིང་།
010020070840000000000000011100001387175791