བོད་ལྗོངས།
སོ་ནམ་ཞིང་པ།

    རྩོམ་པ་པོ་བུ་ཚེ་རིང་རྒན་པ།

    ཁ་ཞེང་ཆེ་བའི་གནམ་ས་གཉིས་ཀྱི་བར་ན།

    སྒལ་པ་ནམ་མཁར་གཏད་ཅིང་ཐོད་པ་ས་གཞིར་གཏུགས་ཏེ།

    ས་བོན་གྱི་མྱུ་གུ་རྔུལ་ཆུས་བརླན་མཁན་ནི།

    ངའི་ཨ་ཕ་ཨ་མ་དང་མཚུངས་པའི་སོ་ནམ་ཞིང་པ་རེད།

    གངས་ཆར་དང་རླུང་བུ། ད་དུང་ཚ་གདུང་དང་གྲང་ངར།

    བཞིན་གྱི་འཛུམ་མདངས་ལྷན་དུ་རེ་བའི་ས་བོན་དུ་བྱས་ཏེ།

    ས་ནག་གི་བྲང་སྟེང་དུ།

    ཐོད་པའི་གཉེར་མ་འདྲ་བའི་རི་མོ་འཁྱུག་འཁྱུག་ལ་ཕབ་དུས།

    ས་གཞི་འདི་ཕ་མ་རེད་ལ།

    ས་གཞི་འདི་བུ་ཚའང་རེད།

    དབྱར་དགུན་སྟོན་དཔྱིད་ཀྱི་གཏམ་རྒྱུད་ཡོད་ཚད།

    ས་བོན། མྱུ་གུ། སྙེ་མའི་རླབས་ཕྲེང་གི་ངོ་བོར་ཐིམས་དུས།

    དཀའ་སྡུག་དང་ལོ་ཟླས་ཕབ་པའི་དཔྲལ་སྟེང་གི་གཉེར་མ།

    ས་རུ་སྨིན་པའི་འབྲུ་རྡོག་བཞིན་དུ་མཛེས།

    སྦར་མོའི་ནང་གི་ཤ་མཁྲེགས་དང་སེར་ཀ།

    སྙིང་ལ་སྒོམ་པའི་དད་པ་བཞིན་དུ་མཁྲེགས་ཤིང་།

    དཔྲལ་བའི་རྔུལ་ཆུ་དང་ཐལ་རྡུལ།

    ས་ནག་གིས་བརྗོད་པའི་སྙིང་གཏམ་མཚར་པོ་དེ་ཡིན་ནམ།

    གྲང་ངར་གྱིས་རྒོལ་མི་ཐུབ་ལ་ཚ་གདུང་གིས་གཞོམ་མི་ནུས་ཤིང་།

    ས་ནག་འདོམ་ལ་འཇལ་གྱིན་རེ་བའི་ཕྱོགས་སུ་སྙེག་དུས།

    གཉེར་རླབས་དང་འབྲུ་རྡོག་ཁྲོད་ཀྱི་འཛུམ་མདངས་མཚར་པོ།

    ས་ཆེན་ལ་ཕུལ་བའི་སྙན་ངག་གི་མཆོད་པ་རེད།

    ནམ་དུས་ཀྱི་བར་གསེང་བརྒྱུད།

    ས་གཞིའི་སྒལ་གཞུང་དུ་རྨི་ལམ་འདེབས་མཁན་ནི།

    ངའི་ཕུ་ནུ་མིང་སྲིང་འདྲ་བའི་སོ་ནམ་པ་ཚོ་རེད།

    ཞོགས་པ་བྱ་སྐད་དང་འགྲོགས་ཏེ་མལ་ལས་ལངས་ཤིང་།

    དགོང་མོ་མུན་པ་ལྷན་དུ་རང་ཁྱིམ་ལ་ལོག་རྗེས།

    རྨི་ལམ་དང་འཛུམ་མདངས་ཁྲོད་དུ་གཉིད་ལ་རོལ་མཁན།

    རུས་པ་གསེར་དང་མཚུངས་པའི་སོ་ནམ་ཞིང་པ་རེད།

    ཆར་ཆུ་དུས་སུ་བབས་ཚེ།

    མངར་བསིལ་བསིལ་གྱི་ཆང་ཞིག་འཐུང་ཆོག

    བདེ་སང་སང་གི་གླུ་ཆུང་ཞིག་ལེན་ཆོག

    ཆར་ཆུ་དུས་སུ་བབས་ཚེ།

    ལོ་རྗེས་མའི་བསམ་བཀོད་སྣ་ཚོགས་ཀྱང་རང་དགར་འཐེན་ཆོག

    ཆར་ཆུ་དུས་སུ་བབས་ཚེ།

    ས་བོན་ལ་མྱུ་གུ་རྒྱས་ངེས་ཤིང་།

    ལོ་ལེགས་ཀྱི་འབྲས་བུ་སྨིན་ངེས།

    རྨི་ལམ་དང་རེ་བའི་ས་བོན།

    ས་ནག་ཁྲོད་དུ་ཡལ་མི་སྲིད།

འགན་འཁུར་རྩོམ་སྒྲིག་པ། བསྟན་ནོར།

ཤིན་ཧྭ་དྲ་བ་མ་རྐང་ཚད་ཡོད་ཀུང་སིའི་བོད་ལྗོངས་ཡན་ལག་ཀུང་སི། ཤིན་ཧྭ་དྲ་བའི་བོད་ལྗོངས་འཕྲིན་ལམ། ཞལ་པར་ཨང་གྲངས། ༠༨༩༡--༦༢༨༢༥༢༡

Copyright @ 2000-2020 XINHUANET.com All Rights Reserved.

འདི་ག་དྲ་ཚུགས་ཐོག་བཀོད་པའི་ཤིན་ཧྭ་གསར་འགྱུར་ཁང་དང་ཤིན་ཧྭ་དྲ་བའི་གསར་འགྱུར། ཆ་འཕྲིན། དེ་བཞིན་ཆེད་སྒྲིག་སོགས་ཀྱི་ཡིག་ཆ་ཚང་མའི་བདག་དབང་ཤིན་ཧྭ་གསར་འགྱུར་ཁང་ལ་བདག་པས་གན་རྒྱ་དང་དབང་ཆ་སྤྲད་མེད་ཚེ་རང་དགར་ཕབ་སྤྱོད་བྱེད་མི་ཆོག

010020070840000000000000011100001391406101