བོད་ལྗོངས།
དྲིན་ཕ་མའི་ཞལ་ནས་འདི་སྐད་ཐོས།

    སྤེན་ཚེ་གཞོན་པ།

    དྲིན་ཕ་མའི་ཞལ་ནས་འདི་སྐད་ཐོས། །

    ཆུ་གཙང་པོ་གཉིས་ལ་སྲུང་སྐྱོང་དགོས། །

    ཆུ་གཙང་པོ་གཉིས་པོ་སྐམ་སོང་ན། །

    ངེད་སྐྱེ་དངོས་སེམས་ཅན་ཇི་ལྟར་འཚོ། །

    དྲིན་ཕ་མའི་ཞལ་ནས་འདི་སྐད་ཐོས། །

    རྩྭ་རྩི་ཤིང་གཉིས་ལ་བདག་སྐྱོང་དགོས། །

    རྩྭ་རྩི་ཤིང་གཉིས་པོ་བཅད་དྲགས་ན། །

    ལ་ལུང་པ་ཐལ་རླུང་དྲག་པོས་ཁེངས། །

    དྲིན་ཕ་མའི་ཞལ་ནས་འདི་སྐད་ཐོས། །

    གང་སྣོད་བཅུད་འཇིག་རྟེན་སྲུང་སྐྱོབ་དགོས། །

    མི་ཚང་མས་གཏོར་བཤིག་བཏང་དྲགས་ན། །

    ས་གཡོ་ཞིང་ཆུ་རུད་གནོད་འཚེས་ཉེན། །

    དྲིན་ཕ་མའི་ཞལ་ནས་འདི་སྐད་ཐོས། །

    ཟོག་སེམས་ཅན་ང་ཚོའི་ཕ་མ་རེད། །

    བྱམས་སྙིང་རྗེས་ལེགས་པར་མ་བསྐྱངས་ན། །

    ཤ་འོ་མའི་ལོངས་སྤྱོད་གང་ནས་འཚོལ། །

    དྲིན་ཕ་མའི་ཞལ་ནས་འདི་སྐད་ཐོས། །

    ནང་ཕུ་ནུ་ཕན་ཚུན་བརྩི་ཞིང་བཀུར། །

    འདང་བརྩེ་བ་ཟབ་མོས་སྐྱོང་ནུས་ན། །

    སྐྱིད་འཚོ་བ་ལྷ་དང་མཉམ་ཞེས་གསུངས། །

    དྲིན་ཕ་མའི་ཞལ་ནས་འདི་སྐད་ཐོས། །

    གཏམ་གང་བཤད་གཞན་ལ་བསྟུན་ཏེ་ཤོད། །

    ཟས་གང་ཟས་ཕོ་བས་འཇུ་ཚོད་ཟོ། །

    དོན་གང་ཡང་རྒྱུན་དུ་བརྟགས་ནས་སྒྲུབས། །

    དྲིན་ཕ་མའི་ཞལ་ནས་འདི་སྐད་ཐོས། །

    ཁྲེལ་ངོ་ཚའི་གཡང་ཆས་རྒྱུན་དུ་གྱོན། །

    ལས་རྒྱུ་འབྲས་མེ་ལོང་གཙུག་ཏུ་བསྟེན། །

    དུས་ནམ་ཡང་རང་སེམས་བྱི་དོར་བྱོས། །

    དྲིན་ཕ་མའི་ཞལ་ནས་འདི་སྐད་ཐོས། །

    རང་རྟོགས་པ་ལྷ་དང་མཉམ་གྱུར་ཀྱང་། །

    ལས་སྤྱོད་པ་མི་དང་མཐུན་དགོས་པས། །

    ནམ་ཡིན་རུང་ཉམ་ཆུང་དམན་ས་བཟུང། །

    དྲིན་ཕ་མའི་ཞལ་ནས་འདི་སྐད་ཐོས། །

    དལ་འབྱོར་གྱི་ལུས་རྟེན་ཐོབ་དཀའ་བས། །

    ཡུན་ཐུང་གི་མི་ཚེ་དོན་ཡོད་ཀྱིས། །

    ལག་རྗེས་ཤིག་འཇོག་ལ་ཅིས་ཀྱང་འབུངས། །

འགན་འཁུར་རྩོམ་སྒྲིག་པ། ཟླ་བ་ཚེ་རིང་།

ཤིན་ཧྭ་དྲ་བ་མ་རྐང་ཚད་ཡོད་ཀུང་སིའི་བོད་ལྗོངས་ཡན་ལག་ཀུང་སི། ཤིན་ཧྭ་དྲ་བའི་བོད་ལྗོངས་འཕྲིན་ལམ། ཞལ་པར་ཨང་གྲངས། ༠༨༩༡--༦༢༨༢༥༢༡

Copyright @ 2000-2020 XINHUANET.com All Rights Reserved.

འདི་ག་དྲ་ཚུགས་ཐོག་བཀོད་པའི་ཤིན་ཧྭ་གསར་འགྱུར་ཁང་དང་ཤིན་ཧྭ་དྲ་བའི་གསར་འགྱུར། ཆ་འཕྲིན། དེ་བཞིན་ཆེད་སྒྲིག་སོགས་ཀྱི་ཡིག་ཆ་ཚང་མའི་བདག་དབང་ཤིན་ཧྭ་གསར་འགྱུར་ཁང་ལ་བདག་པས་གན་རྒྱ་དང་དབང་ཆ་སྤྲད་མེད་ཚེ་རང་དགར་ཕབ་སྤྱོད་བྱེད་མི་ཆོག

010020070840000000000000011100001391723861