བོད་ལྗོངས།
སྙན་ཚོམ་ཡིད་ཀྱི་མེ་ཏོག

    རྩོམ་པ་པོ་སྤེན་ཚེ་གཞོན་པ།

    སྟོན་དུས།

    ནས་ཞིང་སྐྲ་ལོ་བཅད་ནས་ལྷ་ཆོས་ཞུས། །

    སྲན་མས་བསིལ་རླུང་དང་འགྲོགས་གཡེར་དྲིལ་བརྡུངས། །

    པད་ཁ་ཚང་ནས་ཐོན་ཏེ་ཞབས་བྲོ་འཁྲབ། །

    ཞོག་ཁོག་ལ་ཕུག་ས་སྟེང་གཟིགས་མོར་བྱོན། །

    སྲིད་པའི་གླུ།

    དཀའ་སྡུག་ལམ་གྱི་ཕ་བོང་ཤེད་ཀྱིས་གཤགས། །

    བདེ་སྐྱིད་ལམ་བུར་དགའ་བའི་གླུ་སྒྲས་ཁེངས། །

    མི་གཙང་ལྗན་ལྗིན་སེམས་ལ་བྱི་དོར་བྱས། །

    ཕན་བདེའི་སྙན་དབྱངས་མི་ནུབ་རྟག་ཏུ་འཇོ། །

    མ་ཡུམ་མེས་རྒྱལ་ལ་དགའ།

    འཛམ་གླིང་སྣ་མང་རྒྱལ་ཁབ་རྒྱུ་སྐར་དབུས། །

    འོད་དུ་འཚེར་བའི་གཉིས་སྐྱེས་རྒྱལ་པོའི་དཔེ། །

    སྟོབས་འབྱོར་མངའ་ཐང་རྒྱས་པའི་ཀྲུང་ཧྭ་ཞེས། །

    བྱམས་ལྡན་མ་མར་མི་དགའ་བུ་ཕྲུག་སུ། །

    དགའ་ཞེན།

    ཤིན་ཏུ་རྙེད་དཀའི་དལ་འབྱོར་ལུས་རྟེན་འདིར། །

    བཟའ་བཏུང་སྤྱོད་ལམ་ཚུལ་བཞིན་བསྟེན་པ་དང་། །

    རྟག་ཏུ་གཙང་སྦྲ་འཕྲོད་བསྟེན་ལུས་སྦྱོང་སོགས། །

    རྩོལ་བས་བསྒྲུབས་ན་དེ་ལ་དགའ་ཞེན་ཡིན། །

    འཛམ་གླིང་ཞི་བདེའི་ཉིན་མོ།

    ཡངས་འཇིག་རྟེན་ཡོལ་གོར་གནས་པའི་སེམས་ལྡན་ཀུན། །

    གནོད་འཚེ་བའི་བསམ་པ་སྤངས་ཏེ་ཕན་ཚུན་ལ། །

    བརྩེ་མ་བུའི་འདུ་ཤེས་ལྷག་ཏུ་སྐྱེས་གྱུར་ན། །

    ཆེ་ཞི་བདེའི་འོད་ཀྱིས་འཇའ་གུར་རྟག་ཏུ་ཕུབ། །

    ཟླ་འོད་འོག་གི་འཁྲེང་སེམས།

    ཟླ་གཞོན་འོད་དཀར་ཟེཌ་མ་དབྱིག་འཛིན་འདིར་འཐོར་དུས། །

    ཟླ་བ་ལྷ་མོའི་མཛེས་སྡུག་བཞིན་དཔལ་དེ་མཇལ་དུས། །

    ཟླ་བའི་འོད་ཀྱིས་མི་དོ་རྣམ་དཀར་གྱི་ལྷ་མོ། །

    ཟླ་བ་ཁ་ཤས་མ་མཇལ་བྱམས་ལྡན་ཁྱེད་དྲན་བྱུང་། །

(འགན་འཁུར་རྩོམ་སྒྲིག་པ། བསྟན་ནོར།)

ཤིན་ཧྭ་དྲ་བ་མ་རྐང་ཚད་ཡོད་ཀུང་སིའི་བོད་ལྗོངས་ཡན་ལག་ཀུང་སི། ཤིན་ཧྭ་དྲ་བའི་བོད་ལྗོངས་འཕྲིན་ལམ། ཞལ་པར་ཨང་གྲངས། ༠༨༩༡--༦༢༨༢༥༢༡

Copyright @ 2000-2020 XINHUANET.com All Rights Reserved.

འདི་ག་དྲ་ཚུགས་ཐོག་བཀོད་པའི་ཤིན་ཧྭ་གསར་འགྱུར་ཁང་དང་ཤིན་ཧྭ་དྲ་བའི་གསར་འགྱུར། ཆ་འཕྲིན། དེ་བཞིན་ཆེད་སྒྲིག་སོགས་ཀྱི་ཡིག་ཆ་ཚང་མའི་བདག་དབང་ཤིན་ཧྭ་གསར་འགྱུར་ཁང་ལ་བདག་པས་གན་རྒྱ་དང་དབང་ཆ་སྤྲད་མེད་ཚེ་རང་དགར་ཕབ་སྤྱོད་བྱེད་མི་ཆོག

010020070840000000000000011100001396768581