བོད་ལྗོངས།
མྱང་ཆུ་གསེར་གཞུང་རིང་མོ།

    རྩོམ་པ་པོ་པད་མ་དཀར་པོ།

    མྱང་ཆུའི་སྐྱེད་མ།

    མྱང་ཆུ་འཁྲུངས་སའི་མ་ཡུམ་སྐྱེད་མ་ཞེས། །

    སྔར་སོང་ལོ་རྒྱུས་མཁན་པོའི་རྒན་རབས་དང་། །

    དེང་རབས་ཚན་རིག་བདག་པོ་ན་གཞོན་ཚོས། །

    ཀུན་གྱི་བློ་ཁ་གནོད་སྦྱིན་གངས་རིར་ཕྱོགས། །

    སྨན་ལྗོངས་གངས་རི་བ་སོའི་གཞོང་པ་ཞེས། །

    རླབས་ཆེན་མེས་པོའི་ངག་རྒྱུན་དབྱངས་རྟ་དག །

    གཅིག་མིན་ལོ་རྒྱུས་དྲན་གསོའི་རྡོ་རིང་གིས། །

    དོན་ལ་ར་སྤྲོད་དཔང་རྟགས་འབུམ་གྱིས་ཕྱུག །

    ཁྱད་པར་ཟླ་ཞུན་ལན་བརྒྱར་བྱུགས་འདྲ་བའི། །

    ལྟ་ན་སྡུག་པའི་ས་འཛིན་དཀར་པོ་སྟེ། །

    གཟུཌ་དབྱིབས་དངུལ་གྱི་མཆོད་རྟེན་དཔེར་བཀོད་པས། །

    གནོད་སྦྱིན་གང་བཟང་མཚན་སྙན་གང་སར་གྲགས། །

    འདི་ཀོ་དམངས་ཁྲོད་ཤོད་རྒྱུན་རིང་མོ་ཞིག །

    དབུས་གཙང་ཁུལ་དུ་ས་ཁྱབ་རྡོ་ཁྱབ་དར། །

    ཕག་རི་ཇོ་མོའི་སྐུ་ཡི་ཟླ་གྲོགས་ཞེས། །

    ངག་སྒྲོས་དབྱངས་རྟ་དུས་གསར་རྗེས་སུ་བསྙེགས། །

    གནོད་སྦྱིན་གང་བཟང་འདི་ཉིད་སྔར་སོང་གི །

    བགྲང་བྱ་དུ་མའི་སྔ་རོལ་དུས་ཚོད་ནང་། །

    གངས་རིའི་དབུ་འཕང་ཇེ་མཐོར་འགྲོ་དང་ལྷན། །

    ཁ་བའི་མདོག་ཀྱང་གཞན་ལས་ལྷག་ཏུ་དཀར། །

    གཞན་ཡང་རང་རིགས་སྐྱེས་ཆེན་དམ་པ་ཚོས། །

    ཞབས་སོར་པད་མོ་དངོས་སུ་བཅགས་པའི་སྐོར། །

    བདེན་མིན་ཁ་ཚོན་གཅོད་པར་དཀའ་ན་ཡང་། །

    ཤོད་རྒྱུན་དག་ལ་ཡིད་ཆེས་མང་ཙམ་འདུག །

    འཛད་མེད་འཇོ་བའི་བདུད་རྩིའི་ཆུ་རྒྱུན་ནི། །

    ཕོ་རྒོད་གཞན་ཕན་ལས་བཟང་སྙིང་སྟོབས་བཞིན། །

    ཞུམ་པ་མེད་པར་ཉིན་མཚན་དབྱེར་མེད་ཀྱིས། །

    སེམས་ལྡན་སྲོག་དང་ནོར་འཛིན་བུ་མོར་འབུལ། །

    མྱང་ཆུའི་དུས་བཞི།

    ཡངས་པའི་ས་གཞི་དུས་ཀྱི་གོམ་བགྲོད་དང་བསྟུན་ཏེ། །

    ལྗང་མདོག་གོས་ཆེན་མཚར་སྡུག་རྒྱན་ཆ་རུ་བཞེས་པས། །

    སྐྱི་བསེར་རླུང་གིས་སྦྲང་ཆར་སིལ་མ་ཡི་སྣེ་ཁྲིད། །

    མི་སེམས་བྲེལ་བའི་དཔྱིད་ཀའི་དུས་བཟང་དེ་ཤར་བྱུང་། །

    མྱང་ཆུ་གཙང་པོ་རྩེད་འཇོའི་ཀློང་ལས་རབ་བྲལ་ཏེ། །

    གལ་ཆེན་སྐུ་མགྲོན་བསུ་བའི་ལས་ཤིག་རྩོམ་ལ་བྲེལ། །

    ལས་ལ་བརྩོན་པའི་སོ་ནམ་ཞིང་པའི་ཚོགས་རྣམས་ཀྱང་། །

    མྱང་ཆུའི་བུ་མོ་མགྲོན་དུ་བསུ་ལ་རབ་ཏུ་བྲེལ། །

    དེ་ཡང་དགུན་གྱི་ཉིན་བྱེད་དཔྱིད་ཀའི་ཆུ་བོ་ཞེས། །

    གནའ་མིའི་ཞལ་ལ་འཇཌ་པའི་གཏམ་དཔེ་ཅིས་མི་བདེན། །

    ཁྱེད་ཀྱི་རང་བཞིན་བདུད་རྩི་སྨན་དང་ཉེར་མཚུངས་པས། །

    ཐན་ནད་ཕོག་པའི་མུ་མེད་ཞིང་ཐང་ཡོངས་སུ་བརླན། །

    སྤྲིན་བཅུད་བདུད་རྩིའི་གྲུ་ཆར་མྱང་ཆུའི་མངལ་དུ་བབས། །

    ཁྲ་ཆིལ་མེ་ཏོག་སྟོང་ཕྲག་སྤང་ཐང་ནགས་སུ་བཞད། །

    རིན་ཆེན་སྨན་རྩྭའི་དྲི་བསུང་ཕྱོགས་བཞིར་འཐུལ་བས་ན། །

    མ་བོས་སྐུ་མགྲོན་བུང་བའི་ཚོགས་བཞིན་ངང་གིས་འཁོར། །

    སྦྲང་ཆར་སིལ་མས་ནོར་འཛིན་དགའ་མའི་བཞིན་རས་བཀྲུས། །

    གསར་སྐྱེས་ལྗང་པ་གཞོན་ནུའི་ལང་ཚོ་རབ་ཏུ་རྒྱས། །

    མ་ཡུམ་མྱང་ཆུའི་དྲི་མེད་ལྟོ་བར་ཆུ་ཕྲན་སྟོང་། །

    རབ་ཏུ་ཞུགས་པའི་དབྱར་གྱི་དུས་ཚིགས་ཨེ་མ་རྨད། །

    ནམ་མཁར་གློ་བུར་སྤྲིན་གྱི་ཡོལ་བ་ལང་ལོང་འཕྱུར། །

    གཡུ་འབྲུག་གད་རྒྱངས་ཉེ་བར་འཇོམས་པའི་དབྱར་སྐྱེས་རྔ། །

    ལན་དུར་གྲགས་པས་དྲག་ཆར་ངར་མའི་མདའ་མོ་འཁྱུག །

    ཤ་འོད་དཔུང་གིས་མྱང་ཆུའི་ལང་ཚོ་ཅུང་ཟད་རྙོག །

    ཚ་ཟེར་མ་མའི་འགོག་མེད་འོད་སྣང་རབ་ཏུ་འཚེར། །

    ནོར་འཛིན་བུ་མོས་ངུར་སྨྲིག་ན་བཟའ་ལུས་ལ་བཞེས། །

    རི་ཀླུང་མེད་པར་སྣ་ཚོགས་འབྲས་བུས་རབ་ཏུ་བཀངས། །

    ཐང་མར་བརྡལ་བའི་སྟོན་གྱི་རང་མདངས་ཨེ་མ་མཚར། །

    བར་སྣང་དབྱིངས་ནས་ཁ་བའི་མེ་ཏོག་ཅི་དགར་འབབ། །

    གསེར་ལྡན་དགའ་མའི་ནག་ནོག་དྲི་མ་མ་ལུས་དག །

    ཀ་ཅིའི་རས་ཀྱི་གྱོན་པས་མཛེས་པའི་དགུན་གྱི་དུས། །

    མྱང་ཆུ་གཙང་པོས་དཀར་གཙང་གཡང་ཊིའི་མལ་གཟན་བཞེས། །

    སྟེང་ལ་གངས་ཀྱི་ལྭ་བ་སྲབ་མོ་གཟན་དུ་བཞེས། །

    འོག་ཏུ་རང་གཟུགས་དྭངས་མ་འགོག་མེད་ཤར་རེར་རྒྱུག །

    གཡས་གཡོན་ལྗོན་པ་གནས་སྐབས་ཧྲེང་བུར་གནས་གྱུར་ཀྱང་། །

    ནམ་ཞིག་གཡུ་ལོ་ཐགས་སུ་བཀྲ་བར་ཡིད་ཆེས་བརྟན། །

    ད་དུང་ཁྱེད་ཀྱི་གཞན་ཕན་བྱ་བ་རྫོགས་ཐབས་བྲལ། །

    གྲང་དམྱལ་ལྟ་བུའི་དཀའ་ངལ་དུ་མ་ཁྱད་དུ་བསད། །

    མགོ་ནག་མི་བུའི་འཚོ་རྟེན་ཞིང་ས་མཁྲེགས་པོ་རྣམས། །

    བཞའ་དང་བརླན་གྱིས་ཡོངས་སུ་བརྟུལ་བ་ངོ་མཚར་ཆེ། །

    མྱང་ཆུའི་ལམ་བུ།

    སྙན་ངག་མཁན་པོས་མྱང་ཆུའི་ལམ་བུ་ཞེས། །

    བསྟོད་པའི་ཚིག་ཕྲེང་བརྒྱ་སྟོང་ཁྲི་འབུམ་དག །

    གཅིག་ལ་གཅིག་སྦྲེལ་ཐག་འཁྱུད་མེ་ཏོག་བཞིན། །

    མྱང་ཆུའི་ལམ་བུར་བསྟོད་ཚིག་སྦྲང་ཆར་འབེབས། །

    སོ་ནམ་ཞིང་པས་མྱང་ཆུའི་ལམ་བུ་ཞེས། །

    ཚེ་གཅིག་འཚོ་བའི་དྲིན་ཆེན་ལམ་བུར་བསྟེན། །

    མི་ཚེ་གཅིག་གི་རིན་ཐང་ཉག་གཅིག་སྟེ། །

    མྱང་ཆུའི་ལམ་བུར་བསྐྱོད་ནས་མཛད་བཟང་བཏོད། །

    མྱང་ཆུའི་ལམ་བུར་རིན་བྲལ་འགྲུལ་པ་སྟེ། །

    དཔའ་བོ་དཔའ་མོས་གཞན་ཕན་མཛད་བཟང་བསྒྲུབས། །

    ལྷག་བསམ་དཀར་བའི་མེས་པོ་གོང་མ་ཚོས། །

    མི་ཚེའི་གཏམ་རྒྱུད་ལོ་རྒྱུས་དེབ་ཐེར་བརྩམས། །

    ཐོག་མར་གངས་རིའི་ཤར་ནུབ་གཡས་གཡོན་ནས། །

    བབས་པའི་ཆུ་ཐིགས་སྟོང་ཕྲག་དུ་མ་ཞིག །

    རྡོག་རྩ་བསྒྲིལ་ཏེ་རྐ་དང་ཡུར་བུ་ནས། །

    དལ་བབས་མྱང་ཆུའི་ལམ་བུ་གསར་དུ་བཏོད། །

    འོན་ཏེ་ཁྱེད་ཀྱི་ཤང་ཤང་སྙན་དབྱངས་ཁྲོད། །

    ཀྱག་ཀྱོག་ལམ་ཐག་གཅོད་མཁན་འགྲུལ་པ་ཚོའི། །

    ཞུམ་པ་མེད་པའི་སྙིང་སྟོབས་གོ་ཆ་ཡིས། །

    རྟག་ཏུ་ཁོ་བོའི་ཡིད་ཀྱི་བརྟན་པ་འཕྲོགས། །

    སྔོན་ལ་མྱང་ཆུ་རྔ་སྐུད་ཕྲ་མོ་བཞིན། །

    རང་སྐྱ་མ་འཕེར་ཕར་བརྙེས་ཚུར་བརྙེས་ཀྱིས། །

    ཆུ་ཐིགས་ཐམས་ཅད་དམའ་སར་དཔུང་སྒྲིལ་ནས། །

    བག་ཕེབས་བདེ་བ་འཇམ་པོའི་ལམ་དུ་ཞུགས། །

    མདུན་གྱི་ལམ་ནི་ཀྱག་ཀྱོག་འབར་འབུར་ཅན། །

    ཆེད་མངཌ་བཟོས་པའི་དམག་སའི་འཛིང་རགས་འདྲ། །

    མཚམས་རེ་གླང་ཆེན་གཟུགས་དང་ཉེར་མཚུངས་པའི། །

    ཕ་བོང་ཆེན་པོས་མྱང་ཆུའི་འགྲོ་ལམ་བཀག །

    མིག་ཀྱང་བཙུམས་ནས་ཤུགས་ཀྱིས་བརྡུངས་པའི་དུས། །

    ཀླད་པ་འཐོར་འདྲའི་མྱང་ཆུ་མཁའ་རུ་མཆོངས། །

    སྒྱུ་ལུས་དུམ་བུ་ཕྱོགས་བཞིར་ལང་ལོང་འཕྱུར། །

    ད་དུང་དབུགས་རྒྱུན་མ་ཆད་མདུན་དུ་བསྐྱོད། །

    སྐབས་འགར་བལྟ་བས་མི་བཟོད་གཡང་གཟར་གྱི། །

    གད་པ་མཐོན་པོས་འགྲོ་ལམ་བཅད་པའི་ཚེ། །

    བློ་ཁོག་ཆེན་པོས་མདུན་དུ་མཆོངས་པས་ན། །

    སྲོག་འཛིན་སྙིང་དམར་ཁ་ནས་དོན་ལ་ཁད། །

    རེ་ཞིག་བསམ་དྲན་མེད་པར་ཁའི་ནང་ནས། །

    ལྦུ་བ་ལྷོག་ལྷོག་འདོན་བཞིན་ཡར་ལངས་ཏེ། །

    མི་འཇིགས་སྙིང་སྟོབས་ཧ་ཅང་ཆེར་བསྐྱེད་ཀྱིས། །

    ཨམ་བཙིགས་བསྡམས་ནས་མདུན་སྐྱོད་ལམ་དུ་ཞུགས། །

    སྐབས་རེ་ལྷ་སྐས་འཛེགས་འདྲའི་མྱང་ཆུ་དེ། །

    གྱེན་དུ་འགྲོ་དུས་སྨུག་ཆུང་དྲེའུ་ཡིས། །

    ཤིང་རྟ་འཁོར་ལོ་གྱེན་དུ་འཐེན་པ་བཞིན། །

    ངལ་ཞིང་དུབ་ནས་དངན་པ་འཐེན་དང་མཚུངས། །

    སྐབས་འགར་ཀླུ་ཡུལ་བབས་འདྲའི་མྱང་ཆུ་ཡིས། །

    གཟར་པོའི་ཐུར་དུ་རྒྱུག་དུས་བྲག་རྡོའི་གསེབ། །

    འགག་ཟྭ་འཕྲོ་བརླག་ཕྱིན་པའི་རླངས་འཁོར་དག །

    ཐུར་དུ་ཤོར་བའི་ངང་ཚུལ་གསོན་པོར་བསྟན། །

    སྐབས་རེ་རྒྱུ་ཞག་སྒོར་མོ་འདྲ་བ་སྟེ། །

    མི་བཟོས་ཀྱག་ཀྱོག་ཡུར་བུ་ཕྲ་མོའི་ནང་། །

    བསྐྱོད་པའི་དུས་ལ་ཕར་ཚུར་བསྐོར་ཙ་ན། །

    སྐེད་པ་འཆུས་པ་འདྲ་བའི་ལུས་པོ་འཁྱོག །

    རང་ནུས་ཡོད་རྒུས་རང་ལམ་གསར་བཟོ་དང་། །

    གནོད་སྦྱིན་གང་བཟང་བཀའ་དྲིན་དྲན་ཞོར་དུ། །

    གཞན་ཕན་ལྷག་བསམ་དཀར་བའི་མྱང་ཆུ་དེའི། །

    ཚེ་གང་བསྐྱོད་པའི་ལམ་བུར་བདག་སེམས་ཤོར། །

    དེ་ལྟར་མྱང་ཆུས་ཉིན་མཚན་དབྱེར་མེད་དུ། །

    དཀའ་བ་དྲག་པོ་སྤྱད་པའི་འབྲས་བཟང་སྟེ། །

    མདུན་སྐྱོད་ཁ་ཕྱོགས་མཐའ་ཡས་རྒྱ་མཚོར་གཏད། །

    མྱང་ཆུའི་གསེར་གཞུང་རིང་མོ་སྐྱིད་ལ་རོལ། །

    མྱང་ཆུའི་བཀའ་དྲིན།

    མྱང་ཆུ་གཙང་པོས་གཞན་ཕན་ལས་ཀྱི་ཆེད། །

    ལུས་ཕུང་བཞུར་བའི་ཉིང་ཁུ་ཡོད་དོ་ཅོག །

    དམའ་སར་འཁྱིལ་བའི་མཚོ་དང་མི་འདྲ་བར། །

    གྲངས་འདས་ཚེ་སྲོག་ཁྲི་འབུམ་མང་པོ་བསྐྱངས། །

    རྩ་ཆེན་བདུད་རྩི་མྱང་གཞུང་ཡུལ་གྲུར་བབས། །

    འབྲུ་རིགས་སྣ་ལྔའི་ལོ་ལེགས་བང་མཛོད་ཁེངས། །

    གྲགས་ཅན་ཐོན་རྫས་བློ་བརྟན་རྩམ་པ་གཙོས། །

    སྔོ་ལྗང་ཟས་རིགས་སྐུ་གཟུགས་བདེ་ཞིང་སྐྱིད། །

    རྩ་ཆེན་ཚེ་སྲོག་ཡུན་རིང་འཚོ་བའི་ཆེད། །

    བདུད་རྩི་ཡོངས་རྫོགས་བཏང་སྙོམས་ངང་གིས་བཞུར། །

    ནོར་འཛིན་དཔལ་མོར་སྔོ་ལྗང་མཛེས་རྒྱན་སྤྲས། །

    སྙན་གྲགས་ཆེན་པོ་འཛམ་གླིང་ཀུན་ལ་གྲགས། །

    གཞན་ཡང་གཞིས་རྩེར་འབྲུ་མཛོད་ཞེས་སུ་གྲགས། །

    མཐའ་ཡས་ཞིང་ཐང་མཁའ་དང་དབྱེར་མེད་ཅིང་། །

    སྟོན་དུས་འབྲས་བུའི་ཁུར་གྱིས་རབ་ཏུ་བརྗིད། །

    མྱང་ཆུ་ཉིད་ཀྱི་བཀའ་དྲིན་ཡིད་ནས་དྲན། །

    སྤུས་ལེགས་ཤིང་ཆ་འཚོ་བའི་ནོར་བུ་སྟེ། །

    ཤིང་བཟང་སྦྱར་པ་རང་བྱུང་ཉི་གདུགས་གཟུགས། །

    རྒྱ་ལྕང་དཀར་པོ་ལག་ཆའི་ཡུ་བར་མཁོ། །

    གླ་ཚེར་སྡོང་པོའི་བུད་ཤིང་མྱང་ཆུའི་དྲིན། །

    མར་གད་མདངས་འཛིན་གཡུ་གཞོང་རྩྭ་ཐང་སྟེང་། །

    སྐར་ཚོགས་ཐང་ལ་འབབ་འདྲའི་གྲངས་འདས་ཀྱི། །

    ཕྱུགས་རིགས་དཀར་ནག་ཤ་ཤེད་རྒྱས་པ་ལས། །

    ཤ་མར་བལ་སོགས་ཐོན་ཁུངས་མྱང་ཆུའི་དྲིན། །

    ཆུ་འགྲམ་ལྕང་མའི་འཕྱང་འཕྲུལ་ལོ་མ་ལས། །

    གཡས་གཡོན་ལག་པ་རྐྱོང་འདྲའི་བསིལ་གྲིབ་གྲུབ། །

    གམ་དུ་རྒྱུག་པའི་ཆུ་ཕྲན་མེ་ལོང་ལས། །

    རང་གཟུགས་གསལ་བས་དགའ་སྤྲོས་རབ་ཏུ་མྱོས། །

    མཐོ་རིས་དགའ་ཚལ་ཡིད་འོང་ལྡུམ་རའི་ནང་། །

    རྨ་བྱའི་འདབ་གཤོག་རྐྱོང་འདྲའི་རྩི་ཤིང་འཛོམས། །

    དམར་ལི་སེར་ལྗང་མཐིང་མདོག་ཚོན་སྣ་དག །

    སོར་རྩེས་བྲིས་འདྲའི་ཁོར་ཡུག་མྱང་ཆུའི་དྲིན། །

    མཛེས་མ་ཀུ་ཤུས་མིག་ཟུར་ལྐོག་མདའ་འཕངས། །

    བཙུན་མ་ཚ་ལུམ་ངུར་སྨྲིག་ཆོས་གོས་བཞེས། །

    གར་མཁན་ཁམ་བུས་གདོང་ལ་དཀར་དམར་བྱུག །

    འབྲས་ལྡན་གླིང་ཁར་འདོད་ལྡན་སྐྱེ་བོ་འཁོར། །

    བསིལ་དྭངས་རྙོག་མེད་ཆུ་བོར་གཞོན་ནུ་ཚོ། །

    ལ་ལ་གནག་སྣུམ་སྐྲ་ལོ་འཁྲུ་བ་དང་། །

    ལ་ལ་ཆབ་ཞུགས་དགའ་སྟོན་དཔལ་ལ་རོལ། །

    ཐམས་ཅད་མྱང་ཆུ་གཙང་པོའི་བཀའ་དྲིན་ལགས། །

(འགན་འཁུར་རྩོམ་སྒྲིག་པ། བསྟན་ནོར།)

ཤིན་ཧྭ་དྲ་བ་མ་རྐང་ཚད་ཡོད་ཀུང་སིའི་བོད་ལྗོངས་ཡན་ལག་ཀུང་སི། ཤིན་ཧྭ་དྲ་བའི་བོད་ལྗོངས་འཕྲིན་ལམ། ཞལ་པར་ཨང་གྲངས། ༠༨༩༡--༦༢༨༢༥༢༡

Copyright @ 2000-2020 XINHUANET.com All Rights Reserved.

འདི་ག་དྲ་ཚུགས་ཐོག་བཀོད་པའི་ཤིན་ཧྭ་གསར་འགྱུར་ཁང་དང་ཤིན་ཧྭ་དྲ་བའི་གསར་འགྱུར། ཆ་འཕྲིན། དེ་བཞིན་ཆེད་སྒྲིག་སོགས་ཀྱི་ཡིག་ཆ་ཚང་མའི་བདག་དབང་ཤིན་ཧྭ་གསར་འགྱུར་ཁང་ལ་བདག་པས་གན་རྒྱ་དང་དབང་ཆ་སྤྲད་མེད་ཚེ་རང་དགར་ཕབ་སྤྱོད་བྱེད་མི་ཆོག

010020070840000000000000011100001397273921